- 752 -

1449. Dez. 9.

Vnsern fruntlichen dinste zcu allen geczeiten. Erbarn, weizen, liben herren, euch zey wissentliche, das noch alzo heutte nichtis nicht gescheen ist &, sundirn alzo ir vns geschreben habit an dem von Coldicz adir den czu der Sweidenicz czu ir faren vm eynen verswegin man, den ir senden mogit noch ewer schreibunge &. No habe wir ir bracht an dy von der Sweidenicz, dy wissen nicht, sundern ze habin vns gesagit von eynem, der heissit Borwicz, der ist leichte vor czeiten gewest bey vnsern herren dem keysser seliger vnd auch bey dyssem konige &, ab ym zcu vertrawen ist kennen wir euch nicht geschreiben sundir ir rot ist vnd were, das ir eynen aus dem rothe adir von den eisten sendit, wenn ir seyit, ze verre dor eynen komen, das euch zcu thun ist vnd der gleichen hette euch vnser herre der bischoff gerothen; auch habe ze vns gesagit, das dy Breseler habin eynen, der solche botschaft aus richet, der dy wege weit ken Bemen wise, der heissit Nickelleyn. Do mogit ir dy von Breslaw bethin vm den selbigen bothin, dy czeit ist hir, auch ist fyl manschaft hir vnd auch Petervelde vnd an den von Coldicz habe wir is von des bothin wegin nicht kunt brengen. Datum IIIa feria ante Lucie virginis anno & XLIX°.
Peter von der Heyde.
Hans Bantsch.
Niclas Horspicz.

Rückaufschrift: Den erbern vnd weizen ratmann czu Liegnitz vnsern liben herren.

Orig. Kgl. Bibl. z. Berl. Ms. Boruss. f. 569. No. 20.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866